Bejn ħalltejn (Poeżija)

Ninsab f’salib it-toroq

għaliex qiegħda bejn ħalltejn

jekk nagħżilx naħa jew oħra

idejja marbuta t-tnejn.

Il-mingħul jaf jittanta

U jpinġilek kollox sabiħ

Bħal kalamita lejh iressqek

M’għandux minuta ta’ mistrieħ.

U hekk jibda jfaqqas id-dubju

Moħħok jhewden tant li therrih

Garigor invażat f’elf ħsieb

Jixxejjer bħal qasba mar-riħ.

Jew iċċedi jew tibqa’ sod.

Ir-rieda taf tħossha tirtgħod

Imma jekk wieqaf int trid tkun

Tiġġieled ikollok bħall-iljun.

TMIEM