In-nifs tal-poeżija

B’urġenza kbira

naqbad il-pinna fejn inkun

u l-ewwel karta li tiġi f’idi

b’ wisa’ bajdani

naħtafha.

Il-leblieba kbira li jkolli

biex inżewweġ il-pinna mal-karta

tkun qawwija tant

li qabel ma niġbed in-nifs

u nonfħu ’l barra

bħad-duħħan ta’ sigarett

jien -

ma noqgħodx.

Le, ma noqgħodx

Ma nistriehx

Jekk dak it-tkarwit ta’ ġo fija

Ma jiħux il-forma

f’ġabra ta’ kliem u kitba

li jinqaleb dritt għal poeżija

Le, ma noqgħodx.

Għaliex bil-poeżija

il-qalb u r-ruħ jieħdu s-serħan

Għaliex bil-poeżija

Il-piż tal-ħajja jittaffa

U kapaċi jieħu dimensjoni oħra.

Għaliex bil- poeżija

Il-mistoqsijiet retoriċi jagħmlu iktar sens

Għaliex bil- poeżija

Jien nista nkun jien.