Jien għatxan (poeżija)

Karta bajda -

għadha vojta...

Hemm biss traċċa -

waħda -

ta’ tikka blu...

Tikka...

għaliex il-pinna wieqfa.

Iva, l-idea qed tħuf min-naħa l-oħra

tal-garigor ta’ moħħi,

imma bl-ebda mod

donnha ma tista’ tifformula ruħha

f’kitba.

Muża ħelwa

tlaqtni...

ħallejtni solitarja

fid-deżert ta’ qalbi.

Għandi bżonnok bħall-manna mis-sema,

inti wisq miraġġ għalija:

qatra ilma għall-għatxan bħali...

mejjet biex jesprimi ruħu

għaliex uħud mis-sentimenti

ma jistgħu qatt jiġu espressi bil-fomm.

Swat...

kattiv u aħrax -

Hekk hu...

meta l-muża titilqek

u tħallik mimli emozzjoni

mingħajr iċ-ċans li tbattal dak li tħoss.

Katarsi – dak li tkun trid...

tneħħi kull toqol li ġġorr,

isserraħ il-piż minn fuq qalbek

tieqaf biex tgħid għall-erwieħ,

fl-aħħar...

striħajt.