L-imħabba (Poeżija)

Illum, l-erbatax ta' Frar huwa popolari minħabba l-festa tal-maħbubin. Imma l-imħabba trid tintwera ma' kulħadd u mhux bejn il-koppja biss. Li tħobb ma jfissirx li kollox pożittiv jew li kollox ikun ward u żahar. Li tħobb ifisser li tibqa' tħenn u turi azzjoni tajba anke meta l-affarijiet ikunu sejrin ħażin. Illum nixtieq naqsam magħkom din il-poeżija.

“L-imħabba taf tistabar u tħenn”

Hekk jgħid missierna San Pawl

u min iżomm din f’moħħu

kapaċi jara l-aqwa dawl.

Valentinu protettur tagħha

u lejh jiġbed b’qawwa 'l-maħbubin.

Dan issa ilna narawh ħafna

b’forom differenti tul is-snin.

Din l-okkażjoni vera ħelwa,

tiġi ċċelebrata fit-tieni xahar,

jew aħjar biex inkunu preċiżi,

il-ġurnata hi l-erbatax ta’ Frar.

Għalkemm l-imħabba hi sinonima

bejn mhux aktar minn tnejn min-nies,

dina għandha tintwera dejjem

ma’ kull bniedem u bla qies.

U allura issa għedna kollox

tajjeb li nieħdu lil kulħadd ħsieb

Jum Valentinu hu ta’ kollha

għax l-imħabba tiftaħ kull bieb.

TMIEM