Ir-ritmu tal-ħajja (poeżija)

F'jum partikolari tar-rebbiegħa,

iddeċidejt li mmur fil-kampanja

ridt naħrab ftit mid-dinja,

mill-ġenn li toffri l-ħajja.

Hekk kif kont miexja qalb il-ħemda

li n-natura biss taf kif toffri

rajt bidwi jaħdem l-għalqa

fuq spalltu l-piż tal-imgħoddi.

U jien u nħares lejh b'attenzjoni

ġewni f'moħħi ħafna tifkiriet

li fil-fond ta' qalbi xtaqt inkeċċi

mal-ħoss il-qawwi tal-irjieħ.

Kien kollu għalxejn madanakollu,

għax quddiemi lmaħt raddiena.

Din tal-aħħar malajr urietni

il-wiċċ tal-ħajja veritiera.

Kien hemm mumenti fejn,

b'simmetrija liema bħalha

bdiet iddur, iddur u ddur.

Bis-saħħa kienet għaddejha

qisha xi ġuvni fuq mutur.

Hekk hi magħmula l-ħajja

Daqqa 'l isfel u daqqa 'l fuq

Jgħaddi riħ u jkaxkar kollox

Qisu pirata b'vapur misruq.